Hello, tungjatjeta, hola, namaste, nǐ hǎo, bonjour, ciao, zdravo, shalom, janë vetëm disa nga përshëndetjet më të zakonshme në gjuhë të ndryshme, që njerëzit përdorin për të përshëndetur njëri-tjetrin. ‘Dita Botërore e Përshëndetjes’, u krijua për herë të parë në vitin 1973, nga 31 fituesit e Çmimit Nobel për Paqen me qëllim që njerëzit në gjithë botën, veçanërisht njerëzit nga vendet e konflikteve të zgjedhin problemet përmes komunikimit dhe jo dhunës. Ideja e kësaj dite qëndron në faktin që komunikimi i qartë, i qetë sjell paqe dhe pikënisja e kësaj është përshëndetja, me të cilën nis një bisedë më e gjatë.
Për këtë ditë, shumë njerëz nuk kishin dëgjuar më parë. E tillë ishte edhe dëgjuesja e Radio KFOR-it, Nora Kasneci, e cila tregoi se rëndësia e përshëndetjes ndoshta është simbolikisht e vogël, por për dikë mund të ketë rëndësi: “Një përshëndetje me një buzëqeshje kur shihni një të afërm, mik apo kolegë mund të jetë një gjest i zakonshëm për ju, por nganjëherë vetëm një buzëqeshje dhe një përshëndetje mund të thotë shumë për dikë. Nuk e kam ditur që shënohet një ditë e tillë, por gjithmonë kur komunikoj apo përshëndes dikë, mundohem të jem sa më e afërt dhe të ofroj ndihmë nëse dikush ka nevojë për një mik apo dikë të flasë.”
Për tu bërë bashkë pjesë e mijërave shteteve dhe njerëzve që shënojnë këtë ditë, sot ajo çka mund të bëni si shenjë solidarizimi për paqen në botë, është që të mësoni të përshëndesni dikë në disa gjuhë të ndryshme.