Zemra është një nga organet më të rëndësishme të trupit të njeriut, ndërsa kujdesi për shëndetin e saj është një nga hapat kryesorë drejt një jete më të gjatë dhe më të shëndetshme. Prandaj, sot më 29 shtator shënohet “Dita Botërore e Zemrës”, e cila synon të rrisë ndërgjegjësimin për sëmundjet kardiovaskulare dhe rëndësinë e parandalimit të tyre. Kjo ditë shërben si një mundësi për të rikujtuar rëndësinë e një stili të shëndetshëm jetese. Ushqimi i balancuar, aktiviteti i rregullt fizik, shmangia e duhanit dhe kontrollet e rregullta shëndetësore janë ndër masat që mund të ndihmojnë në mbrojtjen e shëndetit të zemrës.
Sëmundjet kardiovaskulare mbeten ndër shkaqet kryesore të vdekjeve në mbarë botën, ndërsa një pjesë e faktorëve të rrezikut lidhen me mënyrën e jetesës dhe mund të parandalohen ose kontrollohen përmes kujdesit të duhur.
Kjo ditë na shërben edhe si një thirrje për komunitetet dhe institucionet që të promovojnë më shumë mënyra të shëndetshme jetese dhe të krijojnë kushte që njerëzit të kenë mundësi të kujdesen më mirë për shëndetin e tyre.
