Pas çdo fotografie fshihet një histori. Një fotografi nuk është thjesht një imazh i fiksuar në kohë, ajo është një copëz e një momenti të ruajtur për të mbetur gjatë në kujtesë. Çdo vit, më 19 gusht, bota shënon “Ditën Botërore të Fotografisë”, duke i kushtuar vëmendje një prej formave më të fuqishme të shprehjes artistike dhe dokumentimit. Fotografia është një gjuhë universale që nuk ka nevojë për përkthim, sepse një imazh mund të përcjellë emocione, histori dhe mesazhe përtej kufijve të gjuhës dhe kulturës.
Në epokën e teknologjisë, fotografia është bërë pjesë e pandashme e jetës së përditshme. Sot, pothuajse secili mban në xhep një aparat fotografik përmes telefonit dhe mund të fiksojë momente të veçanta në çdo çast. Megjithatë, vlera e një fotografie nuk përcaktohet vetëm nga pajisja me të cilën realizohet, por nga syri i fotografit, ndjeshmëria, këndvështrimi dhe historia që artisti zgjedh të tregojë. Në ‘Ditën e Fotografisë’, vlerësojmë jo vetëm fotografët profesionistë, por edhe të gjithë ata që përmes objektivit përpiqen të ruajnë momentet dhe kujtimet e jetës.
Sepse koha kalon, momentet ikin, por një fotografi ka fuqinë t’i mbajë gjallë ato.
