Përgjatë 24 orëve të fundit, Policia e Kosovës ka pasur një sërë intervenimesh në terren, ku dominuan rastet nga trafiku rrugor dhe arrestimet për vepra të ndryshme penale. Gjatë periudhës në fjalë, janë regjistruar disa aksidente trafiku, ku 22 kanë rezultuar me persona të lënduar, ndërsa 40 të tjera aksidente janë shënuar me dëme materiale.
Për të parandaluar shkeljet në komunikacion dhe për të rritur sigurinë në rrugë, njësitet policore kanë shqiptuar gjithsej 2.209 tiketa trafiku. Po ashtu, në kuadër të operacioneve të zakonshme, janë arrestuar 17 persona, prej të cilëve 12 janë dërguar në mbajtje.
Policia apelon për kujdes dhe respektim të rregullave të trafikut, me qëllim rritjen e sigurisë në rrugë dhe shmangien e aksidenteve.
