Zhvillimet më të fundit në botën e teknologjisë sjellin risi në inteligjencën artificiale, pajisje të fuqishme kompjuterike, por edhe shqetësime për mbrojtjen e të dhënave personale. Microsoft ka prezantuar laptopët e rinj të linjës Surface, të projektuar për të ekzekutuar modele të inteligjencës artificiale drejtpërdrejt në kompjuter, pa pasur nevojë për shërbime cloud. Çmimet e pajisjeve nisin nga 2,600 dollarë dhe arrijnë deri në 5,900 dollarë për konfigurimet më të avancuara.
Ndërkohë, në Shtetet e Bashkuara po ndryshon edhe mënyra se si institucionet zyrtare i referohen kësaj teknologjie. Sipas informacionit të bërë publik, Departamenti i Drejtësisë ka udhëzuar personelin të përdorë termin “superinteligjencë”, në vend të “inteligjencës artificiale”, kur kjo është e përshtatshme në komunikimet zyrtare dhe dokumentet ligjore. Udhëzimi lidhet me një urdhër ekzekutiv të presidentit Donald Trump.
Ndërsa teknologjia po zhvillohet me ritme të shpejta, siguria e të dhënave mbetet një nga sfidat kryesore. Danimarka po përballet me një incident të rëndë kibernetik, i cili, sipas raportimeve, ka ekspozuar të dhënat personale të 8.8 milionë njerëzve. Informacionet e komprometuara përfshijnë emra, adresa dhe numra personalë identifikimi të ruajtur në regjistrin kombëtar të popullsisë. Sipas autoriteteve daneze, qasja e paautorizuar nuk u realizua drejtpërdrejt përmes sistemit shtetëror, por përmes një kompanie që kishte qasje të ligjshme në regjistër.
Në të njëjtën kohë, përdorimi i inteligjencës artificiale po zgjerohet në nivel global. Sipas shifrave të raportuara nga OpenAI, ChatGPT përdoret nga më shumë se 1.2 miliardë njerëz çdo javë, ndërsa kompania ka 2.5 milionë përdorues biznesi.
