Çdo vit më 1 tetor, bota shënon ‘Ditën Ndërkombëtare të Muzikës’, një festë që i kushtohet fuqisë së muzikës për të bashkuar njerëzit, për të ndërtuar ura mirëkuptimi dhe për të promovuar paqe në mbarë globin.
Kjo ditë u shpall për herë të parë në vitin 1975, nga International Music Council (IMC), organizatë e themeluar me mbështetjen e UNESCO-s. Qëllimi ishte i qartë: të theksohet rëndësia universale e muzikës si një gjuhë që nuk njeh kufij, fe apo kulturë.
Muzika ka shërbyer gjithmonë si mjet i fuqishëm i komunikimit dhe shprehjes, duke ndikuar në gjendjen shpirtërore, duke frymëzuar ndryshime shoqërore dhe duke ofruar ngushëllim në kohë të vështira. Nga koncertet e mëdha e deri tek tingujt e thjeshtë të një instrumenti në rrugë, muzika vazhdon të jetë pjesë e përditshmërisë sonë.
Kjo ditë është një mundësi për secilin prej nesh, që të kujtojmë ndikimin që ka muzika në jetën tonë dhe të festojmë pasionin për tingujt që na lidhin.
