Sot më 2 tetor, vëmendja ndërkombëtare përqendrohet te promovimi i paqes, tolerancës dhe zgjidhjes së konflikteve përmes mjeteve paqësore. Kombet e Bashkuara në vitin 2007, e shpallën datën e sotme ‘Ditë Ndërkombëtare Kundër Dhunës’, që për synim ka të promovojë një kulturë paqeje e tolerance dhe përkon me ditëlindjen e Mahatma Gandhit, i cili u bë një prej figurave më të njohura të historisë për përdorimin e rezistencës paqësore në luftën për të drejta dhe ndryshime shoqërore.
Mesazhi kryesor lidhet me rëndësinë e dialogut dhe mirëkuptimit në zgjidhjen e mosmarrëveshjeve. Individët, komunitetet dhe institucionet inkurajohen të kërkojnë mënyra paqësore për përballimin e konflikteve dhe të promovojnë respektin ndaj të tjerëve. Ky parim ka rëndësi të veçantë edhe për të rinjtë, pasi kultura e dialogut, tolerancës dhe respektit mund të luajë rol në ndërtimin e komuniteteve më paqësore.
