Këngëtarja shqiptare me famë ndërkombëtare, Elina Duni, rikthehet sonte (04.11.26) në Prishtinë, me një koncert të veçantë në kuadër të festivalit “Prishtina Music Week & Conference 2026”. E shoqëruar nga kitaristi britanik Rob Luft dhe trumbetisti zviceran Matthieu Michel, Duni do të ngjitet në skenën e AMC Hall, duke filluar nga ora 20:00.
Koncerti pritet të sjellë një ndërthurje të jazz-it bashkëkohor me muzikën tradicionale shqiptare dhe tingujt mesdhetarë, elemente që përbëjnë një pjesë të rëndësishme të identitetit të saj artistik. E njohur për interpretimin e veçantë dhe bashkimin e stileve të ndryshme muzikore, Elina Duni ka ndërtuar një karrierë ndërkombëtare, duke prezantuar muzikën dhe kulturën shqiptare në skena të shumta evropiane.
Ky koncert përbën një mundësi të veçantë për publikun në Prishtinë që të shijojë nga afër një mbrëmje muzikore ku takohen kultura, tradita dhe jazz-i bashkëkohor.
