Siguria në trafik dhe respektimi i rregullave rrugore mbeten thelbësore për mbrojtjen e jetës së gjithë qytetarëve. Megjithatë, të dhënat e fundit të Policisë së Kosovës tregojnë se gjatë 24 orëve të fundit janë regjistruar 60 aksidente trafiku dhe janë shqiptuar 2.205 gjoba për kundërvajtje rrugore. Sipas raportit ditor të policisë, në këtë periudhë nuk është shënuar asnjë aksident me fatalitet. Nga gjithsej 60 aksidentet e raportuara, 28 kanë përfunduar me persona të lënduar, ndërsa 32 të tjera kanë shkaktuar dëme materiale.
Raporti përfshin edhe aktivitete të tjera policore, ku gjatë 24 orëve të fundit, janë arrestuar 21 persona, 17 janë dërguar në mbajtje, ndërsa një person është dërguar në vuajtje të dënimit.
Respektimi i rregullave të trafikut shpëton jetë. Policia u bën thirrje të gjithë pjesëmarrësve në trafik që të tregojnë kujdes të shtuar, të respektojnë shenjat dhe kufizimet e shpejtësisë, si dhe të shmangin çdo veprim që rrezikon jetën e tyre dhe të të tjerëve.
