Sot më 30 shtator, shënohet “Dita Ndërkombëtare e Përkthimit”, e këtë vit në vëmendje sjell temën “Diversiteti gjuhësor dhe të drejtat gjuhësore: Fuqia për t’u kuptuar”. Në pamje të parë, përkthimi mund të duket thjesht si zëvendësimi i një fjale me një tjetër por në të vërtetë, është shumë më tepër. Mendojeni një libër që vjen nga një vend tjetër, një film që na tregon një histori të largët, një dokument që duhet kuptuar saktë ose një person që përpiqet të shpjegojë diçka në një gjuhë që nuk e njeh mirë. Në të gjitha këto raste, përkthimi bëhet ura që lidh dy njerëz ose dy botë. Por bota nuk ka vetëm gjuhë që fliten nga miliona njerëz, ka edhe gjuhë që fliten nga komunitete të kufizuara dhe që mbajnë brenda tyre histori, tradita dhe kujtime të brezave. Kur një gjuhë humbet, nuk humbasin vetëm fjalët. Humbet një pjesë e mënyrës se si një komunitet e ka treguar historinë e vet. Prandaj, respektimi i diversitetit gjuhësor është edhe respekt për njerëzit. Secili duhet të ketë mundësinë të shprehet, të informohet dhe të kuptohet, pavarësisht gjuhës që flet. Në fund të fundit, ne nuk kemi nevojë të flasim të gjithë të njëjtën gjuhë për të kuptuar njëri-tjetrin. Dhe pikërisht këtu qëndron fuqia e përkthimit që është arti i cili nuk i zhduk dallimet mes nesh, por na mëson të kalojmë përtej tyre.
Radio KFOR Shqip
