Nga shumë kanale mediale që ekzistojnë në botë, podkasti është një nga pjesët më revolucionare të medias. Dhe sot, më 30 shtator, festohet “Dita Ndërkombëtare e Podkastit”, një ditë që nderon ndikimin e jashtëzakonshëm të podkasteve në mediat bashkëkohore dhe në jetën e përditshme. Podkastet janë bërë një burim i rëndësishëm i informacionit, argëtimit dhe edukimit, që sjellin përmbajtje të larmishme dhe të qasshme për të gjithë.
Kjo ngjarje globale inkurajon krijuesit e përmbajtjeve dhe dëgjuesit të ndajnë eksperiencat e tyre, të zbulojnë podkaste të reja dhe të festojnë lirinë e platformës që ofron mundësi të pafundme për diskutime, ide dhe histori. Nga temat shoqërore dhe politike e deri te kultura pop dhe edukimi, podkastet kanë transformuar mënyrën se si njerëzit konsumojnë media dhe ndajnë njohuri.
Në këtë ditë, platforma të ndryshme dhe krijues të përmbajtjeve bashkëpunojnë për të promovuar rëndësinë e kësaj forme të re mediatike, e cila po vazhdon të rritet në popullaritet çdo vit.
