Fusha e teknologjisë po vazhdon të sjellë zhvillime të rëndësishme… Një nga lajmet më të spikatura të javës është ai për Spotify, i cili ka fshirë mbi 75 milionë këngë të krijuara me ndihmën e inteligjencës artificiale, pasi u identifikuan si përmbajtje spam. Sipas platformës, këto materiale ishin publikuar për të manipuluar statistikat e dëgjimeve dhe për të gjeneruar të ardhura në mënyrë të padrejtë. Me këtë hap, platforma synon të mbrojë artistët, të përmirësojë cilësinë e katalogut muzikor dhe të forcojë besimin e përdoruesve.
Në fushën e robotikës, kompania Unitree ka prezantuar qenin robotik AS2 W, i cili mund të arrijë shpejtësi deri në 22 kilometra në orë dhe të përshkojë më shumë se 30 kilometra me një karikim të vetëm. Roboti është projektuar për të lëvizur në terrene të vështira dhe pritet të përdoret në operacione kërkimi dhe shpëtimi, inspektime industriale dhe misione me rrezik të lartë.
Nga ana tjetër, TikTok dhe YouTube kanë mbyllur rreth 4.7 milionë llogari të fëmijëve nën moshën 16 vjeç në Indonezi, në zbatim të rregullave të reja të vendosura nga qeveria. Autoritetet synojnë të mbrojnë të miturit nga përmbajtjet e papërshtatshme, ngacmimet në internet dhe varësia nga rrjetet sociale, ndërsa shpresojnë që masa të ngjashme të zbatohen edhe në shtete të tjera.
Ndërkohë, Britania e Madhe po shqyrton një sistem të ri taksimi për automjetet elektrike, sipas të cilit drejtuesit do të paguajnë në bazë të kilometrave të përshkuar. Propozimi synon të kompensojë rënien e të ardhurave nga taksat mbi karburantet dhe të sigurojë fonde për mirëmbajtjen e rrugëve. Megjithatë, ideja ka nxitur debat, pasi disa ekspertë paralajmërojnë se mund të ndikojë negativisht në interesin për blerjen e automjeteve elektrike.
