Më 11 dhjetor, bota feston ‘Ditën Ndërkombëtare të Maleve’, një nismë e Kombeve të Bashkuara që synon të rrisë ndërgjegjësimin për rëndësinë e maleve për jetën e të gjitha gjallesave në planetin tonë.
Malet mbulojnë rreth 27% të sipërfaqes së Tokës dhe janë shtëpi për rreth 15% të popullsisë botërore, duke siguruar burime thelbësore, siç janë: uji, ajri i pastër, pyjet dhe biodiversiteti. Megjithatë, këto zona përballen çdo vit me rreziqe të mëdha si ndryshimet klimatike, shpyllëzimi dhe shfrytëzimi i pakontrolluar i burimeve natyrore.
OKB-ja thekson se ruajtja e maleve është jetike jo vetëm për ekosistemet lokale, por edhe për mirëqenien e gjithë njerëzimit, pasi malet ndikojnë drejtpërdrejt në furnizimin me ujë, ushqim dhe energji për miliona njerëz në mbarë botën.
