Kampionati Botëror po dhuron emocione të jashtëzakonshme, ndërsa mbrëmja e sotme dhe orët e para të mesnatës premtojnë të jenë të zjarrta për të gjithë adhuruesit e futbollit.
Gjithçka nis sonte në orën 21:00, me dy sfida paralele. Vëmendja e madhe e publikut do të jetë e përqendruar te Përfaqësuesja e Zvicrës, e cila do të përplasë forcat me Kanadanë, në një duel ku fitorja është jetike për ecurinë e mëtutjeshme. Në të njëjtën kohë, Bosnja dhe Hercegovina do të kërkojë pikët e plota përballë Katarit, në një ndeshje që pritet të jetë mjaft taktike dhe e luftuar deri në sekondat e fundit.
Por, spektakli nuk përfundon me kaq. Sapo akrepat e orës të shënojnë mesnatën, duke kaluar zyrtarisht në datën 25 qershor, vëmendja zhvendoset te dy super-përballje të tjera duke filluar nga ora 00:00.
Kombëtarja e Marokut, e njohur për lojën e saj tejet të disiplinuar dhe luftarake, do të sfidojë Haitin. Ndërkohë, qershia mbi tortë e kësaj maratone futbollistike do të jetë takimi mes Skocisë dhe pesë-herë kampionëve të botës, Brazilit.
“Seleçao” zbret në fushë me petkun e favorites, por skocezët njihen për shpirtin e tyre luftarak dhe befasitë që mund të shkaktojnë në skenat e mëdha.
