Çdo vit, më 12 dhjetor, shënohet ‘Dita Ndërkombëtare për qasje të barabartë shëndetësore’, një nismë globale që vë në qendër të vëmendjes rëndësinë e qasjes së barabartë në shërbime shëndetësore për të gjithë njerëzit, pa përjashtim dhe pa vështirësi financiare. Kjo ditë është një thirrje për veprim, duke nxitur të gjitha vendet dhe organizatat ndërkombëtare të përmirësojnë sistemet shëndetësore, për t’u bërë më gjithëpërfshirëse dhe më të drejta.
Tema e këtij viti “Shëndet për të gjithë: Koha për të vepruar së bashku”, thekson nevojën për bashkëpunim të fuqishëm në ndërtimin e një të ardhmeje ku askush nuk mbetet pas, kur bëhet fjalë për kujdesin shëndetësor.
Statistikat globale tregojnë se shumë njerëz, veçanërisht në vendet me të ardhura të ulëta dhe të mesme, vazhdojnë të përballen me pengesa për qasje në kujdesin mjekësor. Për më tepër, shpenzimet e larta për trajtime shpesh çojnë familjet drejt varfërisë, duke dëshmuar nevojën urgjente për reforma. Në Kosovë, kjo ditë shërben si një mundësi për të nxitur dialog mbi përmirësimin e shërbimeve shëndetësore dhe për të siguruar që çdo person të ketë mundësinë të marrë kujdesin që i nevojitet, pavarësisht nga gjendja ekonomike apo sociale.
Qasja në shërbime shëndetësore është një e drejtë themelore e njeriut dhe bazë e një shoqërie të drejtë dhe të qëndrueshme.
