Muzika rock konsiderohet një nga zhanret më me ndikim në historinë e muzikës moderne. Ajo lindi në vitet 1950 nga ndërthurja e blues-it, country-t dhe folk-ut, për t’u shndërruar më pas në një fenomen kulturor me ndikim global. Që në fillim, rok-u u identifikua me energjinë, lirinë dhe vetë-shprehjen. Edhe pse fillimisht u perceptua si simbol i rebelimit rinor, me kalimin e kohës ai kapërceu kufijtë kulturorë dhe u bë një nga format më të fuqishme të komunikimit artistik.
Nga ky zhanër kanë lindur nënzhanre të shumta, si punk rock, hard rock, heavy metal dhe alternative rock, të cilat vazhdojnë të tërheqin miliona dëgjues në mbarë botën.
Çdo vit, më 13 korrik, shënohet “Dita Botërore e Muzikës Rok”, e cila festohet përmes koncerteve, festivaleve dhe aktiviteteve të ndryshme muzikore. Fansat e këtij zhanri ndajnë këngët e tyre të preferuara, kujtimet nga koncertet dhe pasionin për muzikën që ka frymëzuar breza të tërë. Më shumë sesa një festë muzikore, kjo ditë është një kujtesë e fuqisë së muzikës për të bashkuar njerëzit, për të frymëzuar krijimtarinë dhe për të mbajtur gjallë shpirtin e rock ‘n’ roll-it në mbarë botën.
